Trebisacce-08/09/2014: La nascita della B. V. Maria (di Walter Astorino)

Prov . 8, 22-35

Dóminus possédit me in inítio viárum

suárum, ántequam quidquam fáceret a

princípio. Ab aetérno ordináta sum, et ex

antíquis, ántequam terra fíeret. Nondum

erant abyssi, et ego iam concépta eram:

necdum fontes aquárum erúperant:

necdum montes gravi mole constíterant:

ante colles ego parturiébar: adhuc terram

non fécerat, et flúmina et cárdines orbis

terrae. Quando praeparábat coelos,

áderam: quando certa lege et gyro vallábat

 abyssos: quando aéthera firmábat sursum,

et librábat fontes aquárum: quando

circúmdabat mari términum suum, et

legem ponébat aquis, ne transírent fines

suos: quando appendébat fundaménta

terrae. Cum eo eram cuncta compónens et

delectábar per síngulos dies, ludens coram

eo omni témpore: ludens in orbe terrárum:

et delíciae meae esse cum fíliis hóminum.

Nunc ergo, fílii, audíte me: Beáti qui

custódiunt vias meas. Audíte disciplínam,

et estóte sapiéntes, et nolíte abiícere eam.

Beátus homo, qui áudit me, et qui vígilat

ad fores meas quotídie, et obsérvat ad

postes óstii mei. Qui me invénerit, invéniet

vitam, et háuriet salútem a Dómino.

— 
Walter Astorino